Saturday, March 24, 2007

نتكلم جد شوية؟؟؟؟؟


صورة لإضراب المحلة...تصوير أحمد حربية

هنتكلم شوية جد لكن بدون الدخول في كلام كبير زي النخبة و طبقة البروليتاريا و الانتلجنسيا و الكلام الكبير ده ، بجد شيئ مختلف تماما انك تحضر اضراب عمال غزل المحلة و تشوف 25 الف عامل يطالبون بحقوقهم ، و 100...200 ( على الأكثر) واقفين يطالبون بسقوط مبارك .

ولا فرصة هنا للمزايدة أو القول بأننا نسفه من كفاية ومظاهراتها التي لم نفوت منها مظاهرة واحدة اصلا.

لكنه فعلا شيئ مختلف انك تشوف مجموعة القادة العماليين البسطاء و تقعد معاهم قبل الاضراب بإسبوع و تشوف و تسمع مناقشاتهم و هما بيحضروا لجنة الإعاشة بتاعة الاعتصام.

.تشوفهم و تسمعهم و همّا بيحضروا ليوم الاضراب و افضل الايام التي يبدأون فيها بالإعلان عن إضرابهم...كان ليّا الشرف الحقيقي اني احضر و اشوف كل ده لأ و ايه كمان الناس سمحولي بابداء رأيي في تحديد يوم الاضراب و الحمد لله انهم ما اخدوش بيه و الا كانت بقت كارثة.

وما حدث هنا كان شئ مختلف أيضا ، مجموعة من المتظاهرين لا يزيد عددهم عن العشرين يتشاجرون أمام مئات من جنود الأمن المركزي ، يستخدمون أحط الألفاظ ، ويزايدون علي بعض إلي درجة أن اللوءات الجالسون في الخلف جاءوا ليتفرجوا علي مشهد كان جدير بالمشاهدة حقا.

لا يمكن انكار أن مظاهرات النخبة التي كنا - نعترض عليها في وقت من الأوقات - هي التي فتحت الباب أمام المظاهرات الفئوية ، كسر التابو الأكبر (مبارك) فتح الباب لكسر كل التابوهات ، لكننا يجب أن نتوقف كثيرا أمام الحالتين ، كيف ينظم العمال مظاهراتهم واضراباتهم ؟ وكيف تنظمها النخب ؟، ونحن تستثني الإخوان من هذه المقارنة لأن حركة العمال والحركات النخبوية يتشابهون في ثبوت الأهداف الكبيرة لأعضائها لكن مع تعدد مرجعياتهم السياسية ، مما قد يخلق تنازعات كثيرة لإختلاف الرؤي السياسية، وهو وضع غير موجود لدي الإخوان ، الغريب هنا أننا رأينا هذه الاختلافات والتنازعات بشكل واضح في أوساط النخب و لم نكد نراها وسط العمال ، اكثر من 20 ألف عامل وحدوا مطالبهم ولم يشذ أحدهم عن الإجماع وأقل من 20 (........) كان كل واحد فيهم يري أنه صاحب الرؤية الأشمل وأنه صاحب الحق الذي يجب أن يتبع.

فهل يعترف اخواننا النخبويون باخطائهم؟...ويتعلمون من العمال؟ ، لو طلبين كتير ممكن يكتفوا بواحد!!!

Thursday, March 15, 2007

Slow motion


في كثير من الأحيان أنظر لمن حولي وكأنهم يتحركون بنظام الحركة البطيئة
(
slow motion) وأتعجب جدا لماذا يتحركون بهذا الطريقة؟ ، ولكن الأهم من التعجب هنا هو اختلاف الأحاسيس الذي يحدث عندما يمر أمامي أحد الأصدقاء ، أو أحد الزملاء (مشيها زملاء).
الفارق بين الاثنين هو نفس الفارق بين حمد الله شكرا للنعمة وحمده صبرا علي البلاء.
وهنا تظهر المشكلة الأهم ،
الخوف من أن يكون أحد هؤلاء الذين أشكر الله علي صداقتهم يسأل هو الله لما فعلت هذا بي؟؟!!
الخوف من أن يكون (أحمد) شخصية متساوية الشحنة بالنسبة لمن يعدهم أصدقاءه ، إذا حضر لم يُعترض علي وجوده وإذا غاب لم يُفتقد، وإذا ذكره أحد بعد غياب طال يُشفع هذا التذكر بابتسامة حيادية وجملة من عينة "عايزيين نبقي نتصل بيه يا جماعة" وتختفي الابتسامة وتتوه الذكري في بحر الحياة.
قد يكون هذا هو طبع الحياة ولكن من قال أني سأقبله لمجرد انه كذلك ؟

كنت أريد ان أكتب الكثير من الكلمات ورسائل اعتذار موجهة إلي أشخاص بعينهم عن الفترة الماضية التي أرهقتهم فيها باكتئابي وسخافاتي ولكني شعرت أن الأمر سيتحول إلي ابتزاز عاطفي واستنطاق لجمل من نوعية : ايه اللي انت بتقوله ده يا ابني؟؟ ، عيب عليك اللي انت كاتبه ده، أو ايه يا (تييييييت)اللي انت كاتبه ده؟...ده انت (تييييت) قوي؟؟اصحابي بقي وبيحترموني موت!

فضلت ألا أفعل وأن أعتذر في العموم لكل من سببت له ضيق يوما بوجودي معه.

أحمد

Thursday, March 1, 2007

في السفر 3 فوايد



في السفر 3 فوايد

"عاوز شغل؟! مين ف الشباب النهارده مش عاوز شغل بدل قعدته ع القهاوي؟انا هاجيبلك شغل!!

كلنا هانشتغل مسحراتيه-جمع مسحراتي-!!

ايوه مسحراتيه بس بدل ما نخبط علي طبلة و اشياء ما انزل الله بها من سلطان هانخبط ع القلوب علشان نصحيها!!" جزء من خطبة عصماء اعجبت لدرجة البكاء راكبي الميكروباص الذي جئت به من طنطا بعد ان ودعت اهلي قبل سفري الي سوريا في رحلة عمل لم تكلل بالنجاح-فقري-.

جانبي شخص يبدو عليه الهيام من خطبة الشيخ ابو عمار-مش ياسر عرفات- محمود المصري مش محمود عبد العزيز في المسلسل الرمضاني.

وانا ضايع مع الجملة الساحرة"من كل حسب طاقته و لكل حسب حاجته" اقطع التفكير فيها لاقرأ اجزاء من البيان الشيوعي لو اللي قاعد جنبي عرف كده كنت زماني اتقطعت و الله!!

المهم سافرت سوريا-قلب العروبة النابض بالبعث و البعثيين و القائد الضرورة الاسد الابن ، بس الحق كلهم هناك عروبيين يحتفلون بذكري الوحدة مع مصر في 22 شباط/فبراير من كل عام!و بذلك تحققت الفائدة الاولي للسفر...الراحة من ابو عمار و حسان و الحويني و يعقوب و الخرا ده كله.لكن وجدت هناك من هم اسوأ شيخ الجامع الاموي الذي صليت فيه الجمعة و اضطررت لسماع خطيب قضي ال 45 دقيقة عمر الخطبة في التذكير باهمية المياة و ضرورة الحفاظ عليها و اتباع ارشادات ولي الامر في عدم الاسراف-حشروا ولي الامر حتي ف الحنفيات-يالهوييييييييي!

الفايدة الاولي انضربت بالنار قلت البركة في الفايدة التانية....الشغل اللي رايح اعمله للدستور...باظ و الحمد لله، خالد مشعل بعد ما رتبت معاه حوار لمدة ساعتين بدلا من ساعة واحدة سافر مصر يوم اجراء الحوار لعمل حوار اخر مع زميل من جريدة منافسة.."السيد عمر سليمان"!قلت البركة في الرفيق و المجاهد اللينيني جورج حبش-الحكيم -بلا اسلاميين بلا هباب- ذهبت لألقاه ، اتاري الرفيق سافر الاردن يا نهار اسويييييد!!

المهم بما ان كل حاجة باظت قلت يبقي الكتب هيه الحل اشتريت بكل فلوسي كتب تحفة هاديها للواد حربية علشان يغسل بيها دماغه..مجلدي النزعات المادية للدكتور حسين مروّّّة و حاجات باسعار ممتازة لماركيز ترجمة علماني و ساراماجو و عزيز نيسين و جورج اورويل ووليمة لاعشاب البحر و دورت علي حاجات لــ"اميل حبيبي" بس مالقيتش.

و زرت ضريح صلاح الدين و قريت الفاتحة امام قبره مرتين، مرة علي روحة ومرة علي روحنا احنا العرب و افتكرت جزء من قصيدة بغداد للابنودي:"قاعدين سنين تحلموا بظهور صلاح الدين مافيش صلاح الدين و لا حتي زفت الطين,الحيّ ميّت يا ناس اما اللي مبّت عاش ، دا الحي ميّت يا ناس اما اللي ميّت عاش"

الفايدة الرابعة في السفر فهي اني استريحت من حربية و الاعصر و بسيوني و هو امر لو تعلمون عظيم!!


في الرجوع مفيش فوايد

يااااااااه علي قلبه الأسود ...وانا اللي كنت ناوي أحكي وأقول هوه قد إيه وحشني !!! لكن هه هنقول إيه؟؟ .

أنا بس عايزكم تخدوا بالكم من شوية حاجات صغيرة كده قالها سيد فوق، أولها ان خالد مشعل سابه وجه القاهرة والرفيق اللينيني فك منه علي الأردن ، وبكده يبقي عرفنا العيب في مين...صح؟؟

تاني حاجة هو قال أنه اشتري كتب هايهديهالي كلها ...خليكوا شاهدين!

الثالثة بقي أنه صلي الجمعة وحضر الخطبة من اولها وكمان قرأ "الفاتحة" لصلاح الدين لأ ومرتين كمان!! وأعتقد أن دي أسباب كافية أوي علشان الإشتراكيين يفصلوه ويسحبوا منه لقب اشتراكي متعفن...بس احتمال يسيبولو متعفن بس.

والرابعة أن ما سيحدث لسيد بعد ان يقرأ بسيوني و هاني الأعصر هذا "البوست" هو الأمر العظيم حقا.

 

© blogger beta templates | Webtalks