Saturday, May 19, 2007

حياة بدون تفكير...حياة أفضل كثيرا

أحيانا أتوقف عن الكلام لأنه لا يوجد لدي ما أقوله – وهذا طبيعي – وأحيانا أخري أتوقف لأنه لدي الكثير لأحكيه حتي تصير أمنيتي الوحيدة هي امتلاك القدرة على نقل الأفكار دون اللجؤ إلي الكتابة او الكلام ، وانا الآن هكذا ، حتي انني أكتب دون أن اعرف إلي أين سآنتهي ، نوع من البث المباشر فقط لتلبية رغبتي في الإرتماء في احضان الكتابة التي توقفت عنها منذ عدت إلي قريتي ( في إطار الإستعداد للإمتحانات التي ستبدأ الأحد المقبل ...دعاوتكم بقي) .

افتقادي لأهل الدستـور - رغم التـواصل الهاتفي بيننا - هو احساس أخشي أن أكتب عنه فأبهته! أعلم أني سأكتب عنه يوما ما لكن ليس الآن.

و أعاود التفكير ماذا أكتب ؟ أفكر ، أفكر ، أفكر....آه ...التفكير ، كيـف غاب هذا عن بالي وهذه الكلمة ( التفكير ) كانت الأكثر ترددا الأيام القليلة الماضية من حياتي .

الأمر بدون خوض في تفاصيل مملة - رغم أني حاسس إن الموضوع كله ممل - كان عبارة عن نصيـحة طبية من "طبـيـب القلب" الذي ذهبت له بعد إلحاح من أهلي ، الرجل بعدما استمع إلي و أجري فحوصاته ( موضوع رسم القلب ده طلع مسلي جد!! ) قاللي بابتسامة هادئة " الحمد لله ما فيش مشكلة " طيب الحمد لله قلتها وأنا أنظر له باستـغراب لأنه كان يكتب روشته!! ( لو كان مافيش مشكلة بيكتب إيه الراجل ده؟؟ ) إنتهي من الكتابة و وضع نظارته علي الورقة ( هوه مش هايديهالي ولا ايه؟) وقال "انت مشكلتك في القلق " طبعا هوه قال كده وعينيك ما تشوف إلا أغبي نظرة ممكن تشوفها في حياتك ،نعم ، مش فاهم حاجة ؟، قالي يعني انت بتفكر كتيـر وده اللي مسببلك المشاكل دي الأمر القابل للتطور فخلي بالك!! طبعا سألته أخلي بالي يعني أعمل ؟ وحسيت ساعتها إنه بدأ يشك في تشخيصه لأن اسئلتي ونظرتي كانوا بيقولوا حاجات أبعد ما يكون عن التفكير أصلا.

المهم قال "يعني تحاول تقلل التفكير شوية!!" قالها ببساطة وكأنه ينصحني بتقليل وضع الملح في الطعام ثم أكمل كلامه على اعتبار أن ما قاله لا يحتاج لتوضيح أو شرح ( هوه في أسهل من تقليل التفكير؟! ناس غريبة جدا!) و بدأ يتكلم عن الدواء المكتوب في الروشته ومواعيده و لم ينسي أن يشدد على أهمية الإقلال من التفكير!!

المصيبة بقي والحاجة اللي هاتجنني إن كل يسألني عملت إيه عند الدكتور وأحكيله يقوللي خلاص يبقي لازم تقلل التفكير شوية!!!

يعني أعمل إيه يعني ، والتفكير ده يتقلل إزاي ؟ له تيمر ولا هوه بزرار؟

حد عنده وصفه لتقليل الفكير ويبقاله الأجر والثواب عند الله؟

14 comments:

دعاء عادل said...

الف سلامه عليك يا احمد كنت تعبان ورحت كمان عن الدكتور كل ده من غير ما اعرف
الف سلامه عليك وخلى بالك من نفسك
وربنا يعينك فى الامتحانات
وبالنسبه للتفكير لازم تسمع كلام الدكتور وتقلل تفكير شويه .. ازاى؟؟؟
عادى يا احمد قلل تفكير.. بس ..بسيطه
دى وصفه سهله دى وصفه هايله

Ebtsam said...

ههههههههههههههه
حلوة قوى قلل من تفكيرك دى
طب انا هقولك على وصفة احلى انت تشرب كاكاو ده مهدأ هايل جدا
وتكون موصى الحاجة تعملك دكر بط حلو كده وتاكله لوحدك
وبعدين تنام لمدة 22 ساعة متواصلة اياك تصحى والا الوصفة تبوظ
وبعد ما تصحى هتلاقى نفسك فاقد الذاكرة ومش حاسس باللى حواليك وساعتها بس اقدر اقولك ان العملية نجحت
حمد ع السلامة يا ابو حميد

لو كنت أعلم said...

سلامتك يا أحمد
ألف ألف سلامة
بس بصراحة نصيحة الدكتور وااااااااضحة جداًً
هههههعععععععع

أقولك على حاجة أنا الدكتور قالي بقى إن كتر التفكير والقلق بالنسبة لي هيموتوني ناقصة عمر

هيييييه
حد طايل
يارييت خلينا نخلص
عايز وصفة

امممممممم
أقولك هاجر في حتة ما فيهاش بشر ولا احيوان حتى
ولا أي كائن حي أياً ما كان

وده هيخليك تفكر في كل الحاجات الحلوة اللي انت سبتها وراك
وبرضه هتفكر

هههههييه
من الآخر الجنون هو الحل
وده هيكون شعار حزب المفكرين الجدد الذي أدعوك لتكوينه وسأكون انا أول أعضاؤه
أوكيز
باااااااااي
وادعيلي عشان انا كمان بامتحن
وخلاص هتجنن

Anonymous said...

الف سلامه عليك يا احمد .. بس مع احترامي للاخت ابتسام الوصفه دي ليها اثار جانبيه عند احمد بالتحديد لان هو لما بينام بيحس ان فاته حاجات كتير .. كده هيفضل مقلق 22 ساعه و يفكر في اللي فاته وهو نايم و العمليه كده مش هتنجح :p خليك في الكاكاو احسن ;)

A. HANY

FadFadA said...

أحمد
ألف ألف سلامة , و خللي بالك من نفسك
دلوقتي الدكتور اللي انت روحتله دكتور قلب , صح ؟
ماله بقى و مال دماغك ؟
يا عم فكر زي ما انت عايز و ربك يسترها , ما حدش بيموت ناقص عمر
صدقني , احنا مش ممكن نموت من التفكير , احنا نموت لو بطلنا تفكير
بلاش تفكر ازاي تبطل تفكير ؟ حتى مش هتنفع , لانك برده كده هتفكر
بس النصيحة , حاول لما تفكر , تفكر بهدوء , يعني مش بأعصابك
و على فكرة تفكيرنا ده مجرد سبب , يعني مش هو اللي بيحل , ده ربنا هو مقدر كل شيء
ربنا يوفقك في الامتحان و طمني عليك
محمد

Anonymous said...

والله انا زعلت عليك يا احمد كنت ولد كويس يا الف خسارة علي الشباب اللي مش هيتعوض
بس انا عاوز اعرف مين اللي رسملك قلبك انت رحت لهاني شمس (احد رسامين الكاريكاتير في الدستور)
خدها مني نصيحة الدكتور دا حمار لان عمري ما شفتك بتفكر
سلام انا ماشي
هاني

أحمد حربية said...

دعاء عادل:-
الله يسلمك يا دعاء بس والله أنا كمان ما كنتش أعرف !!
أما بالنسبة للوصفة هيه سهلة فعلا ، أنا مش عارف تاهت عن بالي ازاي دي!!

ابتسام:-
انتي مين ؟ ، ويعني إيه دكر بط ؟ ، ايه هوه الكاكاو ؟ ويطلع مين أبوحميد ده؟...على العموم الله يبارك فيكي أنا مش فاكر عملية إيه بس حاسس إنها نجحت!

لو كانت تعلم:-
أولا: الله يسلمك ويعينك علي الإمتحانات ، ثانيا: لذيذةجدا فكرة الحزب وخصوصا إن ده هايكون اول حزب أعضاؤه يحملون شهادات طبية تثبت أنهم مفكرين ، لكن بما أنه لا وجود للإحزاب في مصر ولا مكان للمفكرين في هذا العالم فقد اتفقت مع أبرز مفكر أعرفه علي الإستقلال الكامل بدولتنا وإن لم نستطع سنلجأ إلي صنع كوكبنا الخاص...لو اعتبرتي إن ده كلام مفكرين يبقي أهلا بيكي معانا!!


أحمد هاني:-
يااااا رااااجل كاكاو ايه اللي أخليني فيه في وجود دكر بط ؟ قال كاكو كاكو قال!

فضفضة:-
الله يسلمك و ربنا يخليك ....أنا بصراحة خفت أسأل الدكتور لما انت بتاع قلب مالك بالدماغ يقوم هوه مديني بالدماغ ، هوه صحيح مفيش حد بيموت ناقص عمر لكن فيه ناس بتموت من القهر وحرقة الدم و....ربنا يستر!

هاني الأعصر:-
من الواضح كده انك فاهم غلط...التفكير ده حاجة مش بتتشاف ، احم ، بتتحس لا مؤاخذة يا أستاذ هاني ولا إيه يا استاذ رضوان؟؟

Anonymous said...

عايز وصفة ، خد عندك
عايز التفكير تبطل .. إنسى إنك مصري ما لكش لازمة، و انسى إنك هتورث زي المعيز الشاردة، وانسى إنك بتاكل عيش مسرطن و بتشرب مية مجاري و بتتنفس هباب و عوادم

عايز يامان للتفكير تبطل.. انسى إنك بني ادم من أصله و عيش في مصر آل مبارك زي تور الله في البرسيم بتاع هو .. الوصفات كتيرة بس لدول جرب و بعدين قولي عملت إيه يا صاحبي .. سلامتك يا أبوحميد و سلامة قلبك

أحمد حربية said...

عبد العظيم:-
سلامة ايه ياعم عبد العظيم بعد اللي انت قلته ده بس؟؟
ولو أنا قررت أعيش كثور لاهٍ في برسيمة زي انت ما بتقترح تفتكر البرسيم مش هايطلع مسرطن هوه كمان؟

Unknown said...

ألف حمد الله على السلامة يا حمادة يا جميل اهدى يا حبيبى وما تفكرش فى حاجة بقى انت تعبت علشان مش قادر تبعد عن صحابك كام يوم أمال اللى اتحرم من بلده وصحابه وأهله لمدة ميعرفهاش غير ربنا يعمل ايه،شد حيلك يلا يا راجل وبطل دلع وقوم لصحابك وحبايبك اللى قلقانين عليك وربنا يطمنا عليك ويبعد عنك لزاجة طلال وهبل الحلوة بوسى ويكفيك شر إيفيهات هانى وما تبقى اشتركى ثورى زى الواد سيد .قول ان شاء الله.
وحشتونى أوى
عبير العسكرى

أحمد حربية said...

عبير العسكرى:-
والله يا عبير انت واحشاني جدا واللي مزعلني اني ما عرفتش أسلم عليك قبل ما تمشي ، ربنايرجعك بالسلامة علشان تحوشي عني اللزاجة والهبل والإفيهات وقبلهم وبعدهم الإشتراكية طبعا

elkamhawi said...

اولا الف سلامة عليك
وكويس انه طلع مفيش مشكلة

اظن الحشيش يكون مهدي جامد

أحمد حربية said...

elkamhawi:-
كل اللي أقدر أرد بيه هوه اللي يسلمك يا مان

Unknown said...

بأمانة يا أستاذ سيد اللى أنت بتحكية هو اللى حصلى تمام حتى بما فيه رسم الفلب لكن انا بحس الناس اللى بتفكر اقرب للاصابة بالاكتئاب زى ما تقول الناس التانية مش بيبقوا فاهمين ومش بيبقوا حاسيين

 

© blogger beta templates | Webtalks