Sunday, May 4, 2008

هاتشوفوا


salvador dali-1943-



احنا الجيل اللي اتفتح وعيه علي سينما الاطفال يوم الجمعة الساعة 10 الصبح..
احنا الجيل اللي درسّوله ان الفلسطينيين قبضوا ثمن اراضيهم من الصهاينة ذهبا و نساء..
احنا الجيل اللي درس في التاريخ ان السادات -الرئيس المؤمن-هو اللي افتتح السد العالي..
احنا الجيل اللي لم يسمع في حياته سوي خطابات مبارك المملة و المملّ..
احنا الجيل اللي كان بيعتقد ان افضل من يخلف مبارك هو"ابو غزالة"او "الجنزوري"او "موسي"..!
احنا الجيلاللي لعلع فيه الكائن محمد ثروت بأغانيه في عيد الشرطة و حفلات تخرج الكلية الحربية..
احنا الجيلاللي بعد ما كبر عرف ان فيه بني ادمين بجد بتغني مش"بت.."..
احنا الجيلاللي اكتشف بنفسه و لنفسه"فيروز" و"زياد" و"مدفعي"و "بشناق" و امل مرقص و جوليا بطرس..
احنا اخر قطفة من الجيل اللي اتربي علي اهمية التفوق في التعليم مش علشان نفسه قدّ ما هو علشان نكون خبر حلو في مرار ايام الاب والام..
احنا الجيل اللي قرف من ضعف انتصاب الاحزاب السياسية في مواجهة الوطني و مراوغة و "ت.."الاخوان المسلمين..
احنا الجيل اللي اتخنق من حساب المستقبل بالمازورة و السانتي متر..
احنا الجيل اللي اول ما قال يا قراية بدأ بمكتبة الاسرة ايام ما كانت بتنشر لكتّاب بجد..
احنا الجيل اللي لما كبر شوية عرف طريق سور الازبكية و بعدين شراء الكتب بالقسط و علي ما تفرج من عمر قناوي و عمر بوك ستور..
احنا الجيل اللي قدر يخض الدولة و يوقفها علي رجل بكام كليكاية عبيطة علي الماوس..
احنا الجيل اللي شل ّالجيزة بمظاهرة لم تتم قدام قسم العمرانية..
احنا الجيل اللي استحمل رؤساء تحرير خصيان من عينة ممتاز"الاوطّ"و اسامة"سراية"و خالد امام..
احنا الجيلاللي كان لسه عيّل في التسعينات بكل شللها و ركودها السياسي الواصل لحد الملل..
احنا الجيلاللي اللي كان لسه مراهق وقت ما كانت السينما بتعرض 9 افلام في السنة نصّهم لعادل امام و نصهم التاني للمرأة اكلة الرجال..نادية الجندي..

....أيوة احنا جيل فرحان بنفسه لدرجة الفشخرة

احنا الجايين..احنا اللي هانخلق مستقبلنا بايدينا ع الارض خطوة خطوة لكن بثبات مشوب بنزق ثوري و طفولي!

احنا الجايين و بكرة تشوفوا

15 comments:

الأغاني للرأفتاني said...

وماذا عن بوجى وطمطم وروبى وماما نجوى يا ابو سويلم
وماذا عن مدرس التاريخ اللى كان بيقولنا
ان فلسطين اولها فلس واخرها طين

عبّرت عن جيل كامل ببعض الجمل البليغه
تحياتى

آيــة said...

لاأنكر شعوري بالانتماء و أنت تتحدث عن هذا الجيل ..
و لكني في الوقت نفسه ليست عندي نفس ثقتك أن..
احنا الجايين..احنا اللي هانخلق مستقبلنا بايدينا ع الارض خطوة خطوة لكن بثبات مشوب بنزق ثوري و طفولي

مش عارفة !!!
بس أقدر أقولك أن هذا الأحساس يجئ تماما بقدر ما يغيب ..
ربنا يستر
تحياتي على العودة بعد الغياب الطويل :)

citizenragab said...

ياااااااااا جامد يا سيد

والله ياعم فرحتني اني من الجيل ده

عودا سيدا

Anonymous said...

مدعي

Anonymous said...

كمان احنا الجيل اللي فرض علي مصر ثقافة جديدة و مصطلحات جديدة
و احنا الجيل اللي كسر التابوهات و المحرمات
و احنا الجيل اللي اتأثر بتجارب الدول المحترمة و الدول اللي بجد يعني
و احنا الجيل اللي مرمط الاستبداد و الطغيان و جابه الارض بشجاعة ذاتية و دون اي حماية
و احنا الجيل اللي بسرعة فرز المخلص و المناضل و المدعي و الافاق
بجد احنا بكرة
و بكرة ده مش بعيد
تحياتي يا ابو السيد يا جميل
عمرو بدر

ROMIL said...

ياه دا أنا من نفس ذات الجيل اللى انت بتتكلم عيله يامان

وأحب أقولهم حتشوفوا وحنوريكم اللى مش حتقدورا تعملوه
وغدا سيولد من يلبس الدرع كاملة يوقد النار شاملة
تحياتي

ROMIL

Anonymous said...

احنا جيل يستاهل الصبر عليه عشان يقدم حاجة بجد
ويخلق ظروف بجد للجيل اللي بعده

بوست جميل قوي

أبو خالد said...

أبنى العزيز / أبو سويلم
سعيد أن أتعرف على هذا الجيل من خلالك
أوجزت فأحسنت
أرجوا الله أن تكونوا جيل الحرية

شريف اسماعيل Chérif Ismail said...

للاسف فعلوا انتوا اللي فتحتوا علي ان الفلسطينيين باعوا ارضيهم مقابل مال ونساء

مش عيب تقول كده برضه

ياريت تصحح المعلومه الغلط اللي اتربيت عليها

الملاح التائه said...

كنت ابحث عن هوية
وربما تبلورت هنا
هوية جيلي
الجميل رغم سوء حظة

كراكيب نـهـى مـحمود said...

أممممم
مصدقة جدا هيشوفوا

جلال كمال الجربانى said...

أنا من نفس الجيل ده
بس فهمنا خلاص ومعدش ينضحك علينا
وأيامنا لسه جايه
مع خالص تحياتى

يلا نحب كزد مدونه عماليه

Anonymous said...

نعم أنا من هذا الجيل :
الذى درس فى كتب التربية القومية الخطة الخمسية الاولى لحسنى مبارك قبل ماتبفى خمسينية.
و فى الأخر ...أهم حاجة.. أحنا الجيل اللى معظم اللى عرف يسافر و يطفش فية سافر و طفش و سابهالهم مخضرة.
قاعدين برة لحد ما ترسى على بر فى مصر المحروسة.
مفيش فايدة.... سلبية ....

أذا كان سيف الحسين و جلال الحسين
لم ينقذا الحسين من ذهب الامراء
اتفلح ثرثرة الشعراء....

alzaher said...

نسيت ان تذكر
جيل الكابتن ماجد وبسام
:)

مهندس مصري بيحب مصر said...

معاك احنا الجيل ده

 

© blogger beta templates | Webtalks