Wednesday, April 4, 2007

اعدلني ع القبله


1

منظرا يشيب الكتكوت و يعرّق القرموط و ينرفز الفيل..مؤتمر القاهرة الخامس للقوي المضادة للحرب الامريكية و الصهيونية ، موسي ابو مررزق- نائب رئيس المكتب السياسي لحركة حماس- يلقي كلمة الحركة و يترك المنصة ليفاجأ ومعه الحاضرون بهجوم اخواني من شباب الاخوان الجامعي - اللذاذ خالص- و قد تكوموا حوله احدهم يقول له و النبي صورة و اخر و النبي تمضيلي علي اتوجراف - أي و الله اتو جراف - و ثالث و رابع و خامس و عشرين يتخاطفون يدي الرجل-الذي احترمه كثيرا- كي يقبلونها.

المهم كنت عاوز اخد من الراجل كلمتين - exclusive- للدستور الحرس بتاع الراجل سابني طبعا لانه في نقابة الصحفيين و ليس في ميدان عام و الاخوة المرافقون لسيادته من الاخوان تركوني ايضا جايز لانهم اعتقدوا اني رايح ألطع بوسة محترمة من اياهم علي أيد سيادته و لكن بعد ان اكتشفوا اني رايح اسأله واحد من اخوة الصف الثاني او الثالث اسمه المهندس علي عبد الفتاح و اخر لا اعرفه شكله سخيف (كيك) قاللي:-

يا استاذ المؤتمر لسه شغال بعد المؤتمر ما يخلص علشان ما نلغوش علي الناس

:- ما الناس كلها كانت ملمومة من شوية و لا علشان مش داخل ابوس يعني و لا ايه؟!

:- معلش و الله يا استاذ!!

:-.........................(شتائم وسخة جدا قلتها في سرّي)

*********************

2

في ذات اليوم تكرر المشهد لكن مع السيد المرشد العام الاستاذ مهدي عاكف الذي القي كلمة متوازنة جدا حيّا فيها المقاومة و دعا لتضامن القوي الناهضة للامركة و الصهينة و خلافه. بس بجد مشهد القبل الملطوعة علي الايادي الكريمة لابد و ان يستفز من كان عنده بقية باقية من دم.

**********************

3

احترم من يقبل يدي الشيخ القرضاوي او محمد حسان او غيرهم لانه يحترمهم او مقتنع بارائهم-قد اتفق او اختلف لكن لا يهم ابدا رأيي طالما الشخص صاحب الشان مقتنع-لكن من دخل عالم السياسة رفع عن نفسه و بارادته القداسة و غيرها من معاني القديسين و الانبياء الاطهار.

تناقض و شيزوفرينيا تنتاب الاخوان من فكرة نزع القداسة عن ابائهم الروحيين ، مثلا حسن البنا هو السياسي المحنك الذي يبرر له الاخوان تحالفه مع احزاب الاقلية( الاحرار الدستوريون ، السعديين و غيرهم) حتي الملك و احيانا النحاس باشا في مساومته اياهم علي تطبيق الشريعة لينسحب من الانتخابات.

في نفس الوقت تجدهم يصفونه بالامام المجدد الشهيد الذي ارسله الله علي رأس مائة سنه يجدد للامة دينها المعوج!!

يا دين ابونا قديس ذو صفات شبه الهية و في نفس الوقت سياسي محنك و بارع و بتاع مفاوضات و بيتحاور مع الجن الازرق و بيلعب بالبيضة و الحجر.سبحان الذي سخر لنا هذا و انا الي ربنا لمنقلبون و الله اكبر و لله الحمد و المنة و اعدلني ع القبلة(بضم الواو او كسرها)و الله و رسوله اعلم و السلام عليكم و رحمة الله و بركاته.

7 comments:

Unknown said...

انا مبسوط ان الرفيق الشيوعي التقدمي الرائع العلامة سيد اتفق مع الصديق الاخواني الرجعي ضيق الافق حربية

وموضوع القبلة ده مش جديد و اتفتح كتير و معارفي من الاخوان بيبرروا دايما ان القبلة دي دليل على التقدير طيب حتى لو كده هو الرجل المرشد بتاعكم معندوش دم ويشد ايده من اللي بيبوسها و يقول استغفر الله استغفر الله و لا يعمله اي منظر مع ان في واقعة مشهورة عن الرسول رفض انه يخلي واحد يبوس ايده

ما علينا انتم احرار في انكم تبوسوا ايد المرشد او اي حتة تانية نفسكم تبوسها بس على الله اسمعك يا حربية بتنتقد الرفاق بتوعنا و لما يبوسوا الرفيقات
و سلملي على المرشد

Abdou said...

بتحلف بالدين ؟؟؟؟!!!!!! يانهار أبيض فين مبادئك يا رفيق .. آه من الشيوعيين و عمايلهم ... أيوه يا عم ما هو إنت زايط و منشكح بكلام الأستاذ محمود أمين العالم للمصري و هايصين و الرفاق راجعين و اخونجية إيه!!!!!!!.. بس أقولك حاجة أنا شايف فيك تحولات كمال اللي ماكتبهاش النجيب في الثلاثية و ان كنت عايز قصدي فارجع للفصل قبل الأخير في الثلاثية .. و ربنا الهادي ، بس برده ما خبيش عليك بوسات الإيد دي بتغيييييييييظ .. إشمت فينابقه يا سيدي ....خوفي بس على حربية تعملها أنت و تربي ذقنك و عم حربية يتشَّوع

واحد said...

إلى الرفاق التقدميين والتأخريين.. (خلف وأمام .كله ماشي) الإخوان الإخوان الإخوان

أو كما قال مولانا خالد الذكر عماد بعرور

شاويش said...

0

شاويش said...

القبلة

او القبلة

اهو كلة لله

ولاخوان

Anonymous said...

السلام عليكم ورحمة الله وبركاته
أولاً:هذه آرائكم وبالتأكيد آراء يجب أن تحترم
فهذه حرية الرأي
ثانياً:بالنسبة لموضوع تقديس الإمام البنا
برجاء القراءة عنه وعن حياته وإنجازته الدعوية
وأعتقد أنك من الممكن أن تغير رأيك
ثالثاً:الإخوان يعتبرون إنتمائهم للجماعة نعمة أنعم الله بها عليهم
ولذلك يعتبرون كل كبار الإخوان ذوو فضل عظيم عليهم لما ضحوا به من أجل دعوة الله
ولذلك تقبيل الأيدي عندهم كتقبيل أيدي الأب والأم
ولذلك يشعر الإخوان بالعزة عند تقبيل أيادي كبراءهم

Anonymous said...

والله انا فكرتك بتتكلم علي البابا شنودة لما اتكلمتوا علي موضوع بوس الايد لكن المصيبة انكم طلعتوا بتتكلموا علي المرشد العام لجماعة الاخوان المسلمين احيانا المهم اني ندمان اني كنت بعيب علي المسيحيين لما يعملوا كدة والمصيبة انهم عندهم مبرر وهو القداسة لكن الاخ الاستاذ الدكتور المهندس مهدي عاكف عنده اية ياريت اللي يعرف يتصل يقولي
هاني الاعصر

 

© blogger beta templates | Webtalks