Friday, May 4, 2007

مؤخرات عارية!!



الصديق العزيز "سيد تركي" مُصر على أن أكتب بوست سياسي ، بعد اكتر من مرة خلفت فيها اتفاقي معه ولم اكتب سياسة بدأ يستخدم ضدي الفاظ محرمة دوليا و دينياً فآثرت السلامة وقلتله حاضر يا سيد ، و قعدت فعلا علي الكمبيوتر وأنا واخد قراري هاكتب سياسية ، سياسية ...ها ، لكن لا حياة لمن تنادي وكأني مش بكلم نفسي!! ، انا جويا مش عايز أكتب سياسية ، الغريب اني مش عارف ليه !!!..أفكر شوية وأقول يمكن نوع من انواع الشفقة علي الناس الطيبة اللي بتدخل مدونتنا ، و يمكن كمان علشان مش عايز أكتب بطريقة "أخصائيين تشخيص الأعراض السياسية " اللي عندهم القدرة والإستعداد يكتبوا مئات المقالات عن مدي انتشار الفساد في البلد وعن البلاء الذي عم والفقر الذي طم والزعماء اللي ماعندهمش دم و سايبين ظباط الشرطة يشتموا الناس بالأب والأم!!! يمكن و جايز ،

لكني في نفس الوقت خايف ... خايف أكتب بجد ، احنا مقضينها هزار وتهريج حتي في الكلام الجد و بنزعل قوي من اللي يقلبها جد بجد!

خايف آجي أتكلم بجد معرفش ، وخايف لو عرفت يتقال على قليل الأدب!

خايف أقول إننا ولاد كلب أغبياء وكل أصحاب السلطة في البلد دي هم فقط الأذكياء .

خايف أقول إن فعلا الغلط ما كنش على فرعون – كل الفراعين – الغلط علي سابوه يتفرعن ويتحكم فيهم .

خايف أتسائل عن سر اصرار الناس - وانا منهم – على القيام بدور الملابس الداخلية للطغاة ، من ستر للعورات في الوقت الذي يجب فضحها إلي حماية لأجسادهم المشوهة بدلا من التخلص منهم و فوق كل هذا تحمل وَسَخهم وقذاراتهم وكأنه قدر لا يمكن تغيره؟!

و إذا كنت خايف من كل هذا فبالتأكيد لن أستطيع القول بأننا تربينا على تعرية مؤخراتنا لكل من يقال لنا أن نواصينا بيده. دون حتى أن نحاول التأكد من حجم ما يستطيع أن يفعله بنا حقيقة ، بمجرد أن يأخذ أحدهم لقب رسمي قبل اسمه نعري له مؤخراتنا بشكل استباقي ..فإنه من سؤ الأدب أن نضطره للطلب !! وحتى إن وجدناه مخصيا – وهو كذلك في معظم الأحوال - لا نتذمر أبدا من استخدام العصا لأن كله يهون ولا نجرح كبرياءه أبدا...حرام!!

صديقي العزيز "سيد تركي" أنا خايف ... ومش هاقدر أكتب ساسية ممكن تسامحني ؟

11 comments:

Anonymous said...

يخرب بيت امك!!
كل ده حزن جواك؟!!
س.تركي

Anonymous said...

صديقي العزيز حربية ...ايه اللي صديقي العزيز وزفت هو احنا اغراب؟!!عموما يا سيدي المؤخرات العارية اللي انت اتكلمت عليها و وصفتها وفصلتها-يا قليل الادب- هي كذلك و اكثر ومش عاوز اقولك ان ده كله ليه نهايه قريبة جدا,قد تكون اقرب مما تتصور بس المهم ان (العمال)يستمروا في مطالبهم و هتقوم ثورة شعبية حتي النصر!!

عاش كفاح الطبقة العاملة
عاش كفاح اللي انت عارفهم

FadFadA said...

يـــا مـــواطــــن
ادع للحكــام بالصبــر علينــا

يا مـواطــن
اشكــر الله الذي ألهمهــم موهبـة القمــع..
وإعــداد الكمائــن

يا مـواطــن
قــل : إللهـم أعطهــم الف عيــن
والف الف سوط
و أعطهــم موهبــة أكبــر
في مــلء الزنازيــن وتفريــغ الخزائــن

يا رب ساعدهــم علينــا
فهم اثنــان وعشــرون حــرًا شريفًــا مخلصًــا..
وإنا يا إلهــي..
مائتا مليــون خائــن

ديه بعض أبيات من شعر لأحمد مطر افتكرتهم و انا بقرأ الحاجات اللي كنت خايف تقولها
محمد

elkamhawi said...

انا مش عارف اقولك اية بجد مش عارف اقول حاجة
بس انتا كاتبه حلو جداً
انا كنت فاكر انى هقرا حاجة كوميدية
ضحكت بس ضحكت علينا

Ebtsam said...

احمد انت هايل عرفت تكتب فى حاجة كلنا زهقنا من الكلام عنها ونجحت فى انك تخلينا نقراها بجد
تحياتى

أحمد حربية said...

سيد تركي:
مش معقول أرد على تعليقك وأنا كاتب البوست كله بسببك أساسا....وعلى فكرة الأهم من استمرار العمال في مطالبهم إنهم يكونوا عارفين المطالب إيه أصلا!

FadFadA :

إيه ده؟؟؟ إنت قرأت الحاجات اللي أنا كنت خايف أقولها.؟..أهوه ده اللي أنا كنت خايف منه!...:)

elkamhawi :

وأنا والله مش عارف أقولك إيه على المجاملة الرقيقة دي ،لكن على أي حال نضحك احنا على وضعنا مرة من نفسنا بدل ما هما قاعدين يضحكوا علينا من زماااااااااااان!

Ebtsam :

تحياتك على رأسي وزيارتك لمدونتنا تسعدني وتعليقك شهادة اعتز بها .... على فكرة جد مش تـثبيت.

Marwa Friday said...

جميل يا احمد
بس دى مش سياسة ..دي مزيكا ربنا معاك ! ا

أحمد حربية said...

مروة جمعة:-
اممممم ، ربنا يخليكي، المشكلة بس اني كده هابتدي أصدق !!

السادة العظام قراء المدونة الكرام:-

الحقيقة بقي أنه لو وقع أي انسان بين مطرقة "سيد تركي" وسندان "النظام" بالشكل الذي حدث معي لكتب أكثر من هذا ، والأهم الآن أن نتفق علي خطة عمل واقعية لنتخلص من ظلمهما الذي تعدي الحدود ونتحد جميعا من أجل افساد مخططاته وكسر انفه واذلاله كما فعل معنا ، طبعا مفهوم انا بتكلم عن مين؟!! أيوه بالظبط كده ، هوه بعينه ، احم ، "سيد تركي" طبعا، ولا انتوا رحتوا فين؟

Abdou said...

سبعين مليون كافولة تبايع السيد الزعيم الفرعون الملهم .. كلنا كافولاتك يا ريس ..حتى الكافولات في مؤخرات أمهاتها تبايعك يا ريس .. و ان مسكت عصايتك التخينة وحبيت تسلك .. فكل الشعب الكافولي مؤخراته تحت أمرك يا ريس .. إديها تسليك و لا يهمك ياريس .. إديها إنتاج تقيل و خفيف دا احنا كافولاتك يا ريس .. إديها .. إديها

Anonymous said...

شكرا على ارسال الرابط يا أخمد
رغم ان أصدقاءك كلهم يبدون معجبين بهذا النص الجديد، ورغم أني من المعجبين بكتابك عادة ، إلا أني لا أعتقد أن هذا أفضل ما قرأت لك. أفضل السخرية الحادة و ولكنها خفية لا المكشوفة ال"متعرية" كما في هذه التجربة الأخيرة.
ولكن أرجع واقول ربما هي لغة الشباب هذه الأيام وربما اللغة في مصر صارت هكذا الآن..
وأنتظر أن أقرأ المزيد من مدوناتك الشيقة.

Anonymous said...

محمد الخولى :
ياعم حربيه وايه فى دنيتنا مش سياسه هو احنا لما نقف نستنى الاتوبيس بالساعه والاتنين دى مش سياسه ولا ما نجوع دى مش سياسه ولانموت فى المستشفيات ولا نغرق فى العبارات ونتحرق فى المسارح والسينمات ونتفرم فى القطارات والسيارات ونتعذب فى السجون والمعتقلات ونتحرم من كلمه حق عند الحاكم ويطلع عنا فى التعليم ان كان فى المدارس او الجامعات ونطلع نقعد على القهاوى والكافتريات
فى ايه ياعم حربيه وهو ايه فى الدنيا دى مش سياسه اسمع كلام سيد واكتب فى السياسه ومع اقتناعى الاكيد ان كله فى الهجايس

 

© blogger beta templates | Webtalks