Wednesday, June 27, 2007

من هنا وهناك


في البدء كان الإعتذار:-

للتأخير أسباب – دوما هناك أسباب - سنتكلم عنها في البوست القادم ( بعد يومين ) ان شاء الله.

أما بالنسبة للأصدقاء الأعزاء اللذين لامونا علي التأخير ، فلهم جزيل الشكر لهذا الإهتمام وأيضا سنتكلم....عنـ......ست.....القـادم (بـ..... .....ين) .........الله.

اجتماعيات أبوسويلم:-

مدونة أبوسويلم تهنيء الأستاذ أحمد سمير الصحفي بالدستور علي ثقة الأستاذ ابراهيم عيسي رئيس تحرير جريدة الدستور في سيادته

- عيسي واثق في سمير – و جعله مسؤلا عن صفحة الـ....احم الــGames في الدستور ، وسمعني سلام Red Alert يا معلم.

أبوسويلم يهنيء الأساتذة (أميرة جاد ، بيسان كساب ، ...وآخرين ) بمناسبة دخولهم جدول المشتغلين بالنقابة ، ألف ألف مبروك وعقبال الشهادة الكبيرة ان شاء الله.

أبوسويلم يهنىء عضو ( الشمال ) بالمدونة الأستاذ سيد تركي بمناسبة تعيينه في الدستور و توقيعه للـعقد ، والعقد الجاي يكون احتراف و في برشلونة بإذن الله ....قول يا رب.

أبوسويلم يعلن تضامنه الكلى والدائم و المستمر مع السادة ( عمرو بدر و أحمد سمير و مصطفي البسيوني ،...... وآخرين ) في مشكلتهم مع نقابة الصحفيين و يؤكد أبوسويلم أن وقفات الرجالة من اختصاصه دون أن يؤثر ذلك على شعاره التاريخي "اجري يا محمد افندي" .

في رد فعل اعتبره المراقبون هو الأخطر والأعنف حتى الآن هدد أبوسويلم باتخاذ رد فعل لم يصرح بطبيعته لكن وضح من طريقته أنه سيكون عنيف جدا في حالة عدم وضع حد لمشكلة الأستاذة دعاء عادل و الأستاذة سمر نور أو في المماطلة لمدة تزيد عن مهلة حددها بيومين.


16 comments:

رضوان آدم said...

حلوة يا تركيش انت وحربية
بس بشرط محدش يجرى
رضوان آدم

Anonymous said...

من محمد الخولى :
أولا جميله جدا ياتركيش
بس انا عاوز اقولك حاجه ياترى وأخرتها ايه كل يوم مدونات وجرايد وإذاعات وندوات ومؤتمرات وبلاوى سوده ومحدش عاوز يقولنا واخرتها ايه طيب انا معاكم مبارك وحش وحبيب العدلى مفترى وابوالغيط هبله ومسكوها طبله ومفيد شهاب ترزى قوانين ووزير البيئه بيلوث البيئه ووزير الصناعه بيدمرها والحياه زفت وكلنا عارفين ان الدنيا خربانه........لكن وبعدين ياسيدنا الحل فين واخرتها ايه احنا زهقنا من الكلام ووجع الدماغ ولا اقولك تعالى نروح مكان ما ونجيب شئ ما ونشرب حاجات ما وبعدين نفكر ونشوف حد يحلنا مشكلتنا

أحمد حربية said...

رضوان آدم:-
انت الأحلي يا استاذ أما بالنسبة للشرط ...انت مش شايفه مبالغ فيه شوية؟

محمد الخولي :-
أولا أنا أحمد مش تركيش...البيه سايب المدونة من فنرة من غير ما يسأل عليها

ثانيا انت -والله أعلم- يا محمد- لم تقرأ البوست أما عن آخرتها فالأكيد اننا لو رحنا مكان ما نجيب أشياء ما ونشرب أشياء ما فعمرنا ما هنلاقي حل لمشكلتنا.0

Marwa Friday said...

صباح الورد يا أحمد حربية وياسيد تركي ..ألف مبروك على العودة ..عود حميد والعود أحمد (وسيد أيضا عشان ماحدش يزعل مننا)! ..مبروك لكل السادة اللي اتعينوا واللي اشتغلوا ..تهاني لسيد تركي وأحمد سمير _ماشاء الله وش العروسة عليه حلو - ألف مبروك لأميرة جاد وبيسان ..وعقبال يارب ما أفرح زيكم كده واتعين رئيس لصفحة في المشمش ..ألف مبروك التدوينة يا عم أبو سويلم ..الله يرحمك يا محمود يا مليجي ..صباح الورد! ا

المصير said...

البوست خفيف قوى كالعادة ياحربيه ..بس انتا كده شردت للجورنال ومشاكله قدام الناس كلها ...هههههههههه

Anonymous said...

محمد الخولى:

انا من الاخر مش عارف اعمل حاجه غير انى اكتب بس
من الاخر ياعم سيد انت وحربيه والله الدنيا دى ما تستاهل ان الواحد حتى يفكر فيها, احنا مين من الاخر؟ والله احنا ما نساوى اى حاجه ولا لينا اى قيمه فى الدنيا دى لأ استنى لينا دور مهم هو اننا ينضحك علينافى كل الاوقات من الحكومه والمعارضه والاحزاب وحتى البنات !! بندافع عن قضايا وبنتفاجئ فى النهايه ان لا فى قضيه ولا حاجه, وبنعلى صوتنا ونقول اننا معارضه ومش عارف ايه والواضح اننا بنعارض مين والله بنعارض نفسنا وبنكذب كلامنا اللى قولناه قبل كده كل ما أشوف واحد من اللى عامل نفسه من المثقفين والمتفلسفين واللى شايفين ان الحل لكل المشاكل عندهم افتكر واحده من اجمل رباعيات صلاح جاهين واللى بيقول فيها "الفيلسوف قاعد يفكرسيبوه
لا تعملوه سلطان و لا تصلبوه
ما تعرفوش إن الفلاسفه ياهوه اللي يقولوه بيرجعوا يكدبوه
عجبي !!!
صدقت ياعمنا, والله العظيم صدقت كلنا بتوع كلام فلا فى معارضه بتقولنا الحل فين او تريحنا من صوتها العالى وبزءات افكارها ولا حكومه بلد عاوزه تسبنا وتغور
انا من الاخر زهقت وكف.... وكفانى كده

FadFadA said...

أحمد
ياريت تبلغ تهنئتي لأحمد سمير ( اللي ماعرفوش) على المسئولية الجديدة , و كذلك تهنئتي لأميرة و بيسان ( اللي برده ماعرفهمش ) , و أيضا تهنئتي لسيد ( ده بقى أعرفه من خلال الكتابة ) , و بلغ تضامني مع عمرو و أحمد سمير و مصطفى و الآخرين في مشكلتهم و احنا معاك يا ريس بس انت تقول امتى نجري و ما تجريش لوحدك

بجد أسلوبك بيعجبني جدا , ربنا يوفقك

محمد

Anonymous said...

ربنا يخليك يا وحيد علي التهنئة بس انت نسيت تهدي لي اغنية مش مشكلة هاسامحك المرة دي بس بعد كدة لما تيجي تعمل لي اهداء تقول من بابا و ماما ووحيد الي الامورة اميرة ماشي؟؟؟؟
و بخصوص الامامير التانيين فاهديلهم نيابة عنك و عن ابو سويلم اغنية شباك حبيبي يا خشب الورد للمطرب الشاب عبد العزيز محمود

Anonymous said...

هى ديتها اتنين صعايدة يقفلوا الجرنال ونخلص بدل المؤازرة والتهديد الشفاهى ده، ولا أيه

Anonymous said...

نبلغكم أنه من المقرر حل مشكلتنا يوم الخميس صباحا وفقا لتصريح رسمى أدل به الأستاذ إبراهيم عيسى، ونجاملكم فى الأفراح يا أبو سويلم

Anonymous said...

والله يبقى عبيط اللى يفكر ان الجورنال عمل كده عشان نقعد نهنى اسمه ايه ده اللى معرفوش وفلانه الى كمان معرفهاش دى ياامور " انت وهى" سياسه وسياسه بنت كلب بتقول نفرحهم النهارده وبكره نطلع عينيهم وقدامكم المثل فى الكام واحد اللى ليهم مشاكل مع النقابه واللى برضه واضح قوى ان الجورنال بايعهم بيعه سوده واللى بتقول ان عيسى وعد ولا مش عارف دى ايه هى كمان مشكلته هى واللى معاه بس اكيد فيها برده بياعه على العموم ان اول مره اشوف المدونه دى ومش عارف حاسس كده انى هبقى متابع ليها ومعلهش ان كنت طولت عليكم وكمان اكيد غلست ان عارف ان اول انطباع بيدوم بس لما تعرفونى اكتر هتغيروا رأيكم فى غلستى اه نسيت ااقولكم انا اسمى "" ديفيد مارك ""

أحمد حربية said...

مروة جمعة:-
صباح الفل يا استاذة...الله يبارك فيكي بالنيابة عنهم جميعا ، وبالنسبة لصفحة في المشمش فأنا مستعد اقف جنبك فيها بقوة علي شرط إنك تعملي زي أحمد سمير وتعلنيني نائب رئيس الصفحة..المهم جهزتي التصور ولا لسه؟

الأسطورة :-
انت الأخف يا باشا ، بس أنا يا عم لا شردت الجرنال ولا حتي قلت إن فيه مشاكل ، وكمان ده مش منظمة سرية ده جرنال والناس كلها بتقرأه..ولا انت مش مع الشفافية؟
محمد الخولي:-
ومين سمعك يا زعيم؟!
فضفضة:-
اعتير التهنئة وصلت و وشكرا جدا على المجاملة الرقيقة دي.
ملك:-
واستني للمرة الجاية ليه من دلوقت أهوه"من بابا وماما وخالو أحمد وجدو وتيتة بالأراضي الحجازية إلي الأمورة ملك ...ألف مبروك المشتغلين وعقبال بقية العواطلية" تمام كده يا اساتذة؟

Anonymous 1:-
احنا عندنا في الجرنال أكتر من 10 صعايدة ، ومقر الجرنال خلف سفارة الكيان الصهيوني ....يعني الإتنين الصعايدة دول يجيوا يشربوا 2 شاي تقيل وبالسلامة.
سمر:-
الحمد لله وان شاء الله الموضوع يتم علي خير ويجع الأيام القادمة كلها أفراح...تفتكري؟!
Anonymous 2:-
الأخ ديفيد مارك:أنت بالتأكيد سمعت القول المأثور "أهل مكه أدري بشعابها" وانت يا سيدي من الواضح أن معلوماتك عن شعاب مكة كمعلوماتي عن اللغة القشتالية ، انا لا أسفه من رأيك ولكن من فضلك لاتهبط بأسلوب الحوار لكلمات مثل "يا أمور انت وهيه" و ما على شاكلة هذا الكلام..شكرا لزيارتك و علي فكرة الإنطباعات الأولي لاتدوم إذا تغير السلوك...صباحك فل.0

لو كنت أعلم said...

هاااااااي
أنا رجعت أخيراً

وحشتوني جداً

وإيه يا عم ما سجات التهديد دي

عموماً

إحنا وقت اللزوم
رجالة وهنقف وقفة رجالة
ملحوظة:
أمانة عليك وإنت بتجري تبقى تاخدني فإيديك
سلاااااااام

واحد said...

سيد حربية وأحمد تركي ..وابنهما الناتج عن تزاوج لا جنسي (علشان الناس القبيحة) نشارككما التهاني والأفراح والليالي الملاح ..وأخص بالتهنئة الأستاذ أحمد سمير بتاع الجيمز .. والنبي حبة طاولة وكوتشينة علشان الحبايب..والنبي ياعم أحمد إديله كورس مكثف ميدل و ريد ألرت وحبة فيفا كمان ..

Anonymous said...

هاني الاعصر

انا ما انبسطش من البوست قد ما
انبسطت من التعليقات بجد انا بحبكم جدا يا جماعة وحبيت التعليقات بتاعتكم كلها ما عدا تعليق واحد بتاع واحد حيوان وتخلف وجزمة
علي فكرة انا مش قصدي رضوان ادم ولا قصدي الخولي ولا قصدي اميرة جاد ولا قصدي سمر نور ولا قصدي احمد حربية وسيد تركي ولا قصدي مروة جمعة ولا قصدي احمد ندي
معلش يا جماعة مش هقدر اقول اسمه

الملاك الحزين said...

بجد يا جماعة الف مبروك والله فرحت لكم قوى مبروك يا تريكش انت وبدر بجد انتوا ناس كويسة قوى

 

© blogger beta templates | Webtalks